Làrach Eaglais
The làrach eaglais san Ros Mhuileach
anns nach robh luchd-èisteachd
no seirbheis cràbhaidh on latha
a chuireadh Inbhir Chèitein.
Latha ’n tug uabhar ar cinnidh
an leum àrd anns a’ bhiothbhuan,
an cruinn-leum a rinn am milleadh,
a dh’fhàg an darach ’na chritheann.
Gearrar latha gu ruig buantachd
mar a ghearrar màrmor ’s òr,
anns a’ ghiorrad tha an sìneadh
air am beir an gaol ’s a’ phròis.
Tha beatha fada ’n cuimhne bàis
nuair ghearras euchd a’ bheatha chuim:
Niall Buidhe òg san leabaidh ùrach
’s Eachann Ruadh an crèadhaich thruim.
Ach dè mu na ceudan eile
is ficheadan dhiubh cheart cho àrd
anns an spiorad rin ceann-cinnidh
is ri bràthair a’ bhàird?
* * *
Sgrùd
liosta nan dàn a rèir na h-ama
Sgrùd
liosta nan dàn an òrdugh na h-aibidil