A-nochd air gualainn Sgùrr Ùrain,
air fras-mhullach Chinn t-Sàile,
os cionn ùrlar Ghlinn Seile,
cha dhamh no eilid mo mhànran.

’S ann tha Iain Mac Mhurchaidh
sìos is suas air a’ chòrsa,
agus ceò Torra Laoighsich
buan fo choibhneas nan smeòrach.

Cluinnear Fearchar a’ Choire
le fead ceann a’ mheòir ann
agus Allt Rìgh na Tuaighe
ruith mu bhruachan bu nòs da.

Tha Donnchadh Mòr Torra Laoighsich
air Sliabh an t-Siorraim san àraich
agus Donnchadh nam Pìosan
an Inbhir Ìonaid na h-àrd-choill.

Tha Aonghas Og Ghlinne Garadh
an Clachan Dubhaich fon starsaich,
agus Treas Làmh na h-Òlachd
fo fhòd Cnoc nan Aingeal.

Tha àrmainn Chloinn Mhathain
mu Ach an Dà Theàrnaidh,
is Clann MhicRath a’ dol dhachaigh
a Chrò ainmeil Chinn t-Sàile.

Àrd-cheann bòidheach Sgùrr Ùrain
toirt na sùla thar linne
gu roinn eagagach Liathaich
agus crìochan Beinn Nibheis.

Tìm ’na stad air an aonaich
agus faoin ’na mo dheòin-sa,
on ’s co-ionann dom rùn-sa
luchd an-dè is a’ bhòn-dè.

Is co-ionann dom aire
na tha maireann no faondrach,
agus gaisge nan Sàileach
cho ùr ri àilleachd an aonaich.

Buidhe, buidhe don chloinn sin
fhuair an loinn seo mar dhùthchas;
is gile alladh nan Sàileach
le geal-shneachda Sgùrr Ùrain.

Tìm ’na chuartagan gaoithe
mu chaisead nan leathad,
Tìm ’na chuartagan srutha
tighinn tuath tro Chaol Reatha;

giùlan luingeas Chloinn Dòmhnaill
gu gleac còmhraig na Cailleach,
agus Uilleam Dubh Shìophort
suas an gleann chur a chatha;

tighinn le oiteag nan òran
is ’na cheò air na slèibhtean,
’na dhriùchd air a’ chuimhne,
’na bhristeadh tuinn air an lèirsinn;

’na dheigh air Sgùrr Ùrain
is ’na smùid air na h-àirdean
far bheil buadhan na h-Albann
ceithir-thimcheall Chinn t-Sàile.

Sgrùd liosta nan dàn a rèir na h-ama

Sgrùd liosta nan dàn an òrdugh na h-aibidil